Jam 4 | BEF | STEP | Lenali henabe lite kenasabo bite luba hilata nehabe? Komopatinigu foipana lenibita hina nasanauba lenugufagu huto lilago luba huto hulata nohibe.

James 4

Mono'ani men'ina bona'i hiti mino koguna meilo

1 Lenali henabe lite kenasabo bite luba hilata nehabe? Komopatinigu foipana lenibita hina nasanauba lenugufagu huto lilago luba huto hulata nohibe. 2 Ya nehite laga lepesina nasana'mu bona'i enoho fililune'mu nehabe. Ana'ina'mu lenegekesa yigiba yigiba hite lepesina nasana lilune'mu nehago to melepinogo kenasabo bite luba sipi hilata nehabe. Ana'ina'mu lenebesilinana melise fa'mene neminabe. To hena'mube? Lenali Hu'mamofitoga kehe meise neminabe. 3 To ana'ina mone kumu Hu'mamofitoga buka ti'ahanaya kehelise'natini fulu luto minatita lenalitini lenugufatiniuba kehelina'asigo aitoga lilana ya'ma Hu'mau ana'ina melepilube'mu nohibe. 4 Ka mekeheli'ahana bona'ise. Melugu bona'magi kumu kehelilata nehana ya suhi hite laga lepesilina nasana'mu kehelilana ya'ma Hu'mamofihi fateha'a lolo hilabe lite lenali menekehelifiye? Mono'ani meni'ina bona'magi kehelilata nehana nasana'muko lepesilina ya'ma Hu'mamofihi bona'a meminalana'mu yabe. 5 Lenali kehelilo. Hu'mau mono bukugu mone kaga luto lu'ehina ka'a yamofihi hapa'a futu'a meni'igo ana kaga ni'ibe:Nani ya'ma bona'magihi komopa'anigu molo epolo'ohuna enemeha'aniuba foipana enibita hina nasana amuya'a lolo hi etalifihe? luto lu'ehina yabe. 6 Ya hu'ehinaya libita hulata nohinana laga mehinana'mu keheli meemilabe luto lele'mo hetofa hulata nohibe. Mono bukugu kaga ma luto lu'ehinamo ni'ibe:Hu'mau ai'a enugufa limo titi bona'magihi enele'mo fitu fo he'milata nohinagi agoya hu neemina'amagihi enele'mo hetofa huto enehe'molata nohibe, luto lu'ehina. 7 Yana'mu lenali Hu'mamofitoga i hepilete agoya hu emilo. To Satahi le'mo he'mite ule'ale minenogo ai koli huto bufa hilina'mu yabe. 8 To Hu'mamofihi gobisalo lenifita i'ehite bilana yamofihi ai'a ana huto lenogobisalo alina'mu yabe. Foipa nasanatini ya'ma li kele li he'milo. Kenetufatiniuba li gelehe hite loe lae nehana bona'ise, li hetele he'mite komopatini nokala hilo. 9 Lenali hapatinimofihi leniginaga nefinogo sipi yibi helite nebite leniginaga fino. Kiya yokolo'i hite lenegelo mebise hilanaloti leniginaga fino. 10 Sipi Bomofihi bulo limite neminana'a ya'ma ai'a lenele'mo saga hilube'mu nohibe.

Lenalalutinigihi ka foipa epelata nasana

11 Nalalu'nigita, lenalitini ka foipa'a melilo. Moneuba ai lalu'afi kumu ka foipa'a lu etalina ai ya'ma Hu'mau keya ka lu'ehina kagamofihi li sibina hulata nohuto ana kagamofihi loko nohibe. Kai Hu'mau keya ka lu'ehina li sibi hilata ya'ma kegekesa yigito ka lamana'a meni'ibe luto lilatamoya, ana keya kalo mege'i mololata menohane. Ana kagamofihi loko huto fa'mene nominane. 12 Hu'mau ai'a keya ka lu huto huloto kaga'a mone'a hiti noluto guna molo letalube'mu nohibe. Ai'ago lubuto bilinamo ni'ibe to ai'ago lele'mo loko hilinamo ni'ibe. Ya nohinogo ya'ma bona'magihi hapa hapa'ani heletuya'a lilata nehana yamofihi lenali foyatini meni'ibe.

Lolo hite minete nehana nasana'mu lenugufatini limo titi mehilo

13 Lenali yagofi yata'ifi hepa'i monetoga buto foya kana moneko'i minototi foya lilototi yogo fe'nohi babu lito li huto hilune lite lilata nehana bona'i ya'ma kaga mone lu lepilugi, keheli'ehilo. 14 Yagosi huto hilibe lite ana'ina ya'ma lenali mekehelibe. Lenalitini ya'ma minete lite nehana logo lokiya'a ya suhi huto ni'ibe. Logo lokiya'a notigo bona'magi kana'a nesi'a minoto bu gelago mele'isi su hoto fenene hilibe. 15 Yamofi kumu ma lite lilo: Hu'mau keheli'ehinogo lilina'a malalina'a kehelilune bati huto minoto ho tito muyalo umalo hilune lite, ya lilo. 16 Yatai ya'ma lolo hite melete nehana nasana'mu lenugufa limo titi hilata nehana yamofihi bati mehibe. 17 Ya hu'ehina'mu mone luga'amagi enali ana'ina lamana'a lilune lite kehelilana ana nasana melilana'a ya'ma foipanamofihi nona'a enogobisalo tito minalina gumi'i lilana'mu yabe.